Euver ôs
Vrinde die zich idder jaor mit de vastelaovend waer tege kwame, opperde ut idee um ein vereiniging op te richte. Zoë gezach zoë gedaon en van ut ein kwaam ut ander. Nao ettelikke verkapte zoepaovende, waord ens intellik de knaup doorgehak! De vereiniging meus d'r kômme!
In ut veurjaor van 2007, um precies te zien op 16 mei, is ôs vastelaovesvereiniging opgerich. D'r waorte statute opgesteld en we ginge ôs melde beej de Kamer van Koophandel: de vereiniging waar ein feit!
Nao oprichting bestônd de vereiniging oét 27 leeje. Waorônder 15 volwassene en 12 kinder. Taegewaordig besteit de vereiniging oét 38 leeje.
Ut haufdoel van de vereiniging is ut meilaope in de groeëte optoch van Venlo met daor aan veuraafgaond alle zaake die daorbeej kômme kiéke. Heejveur zien dreej kemissies opgerich, te weite:
- Joeks kemissie
- Technische kemissie
- Kleier kemissie
Al dit met as doel op ein kwante menier nao de vastelaovend toe te laeve.